依家上網book酒店真係好普遍，既方便又抵，click幾下滑鼠就搞掂。不過對一啲新手嚟講，開始嘅時候往往有啲嘢唔太清楚，好似今日想講嘅房型同床型問題，好多新手都唔係好分得清：Twin bed係咩意思？Double bed又係點？King size bed到底有幾大？呢啲名詞對於新手嚟講，的確唔係一時三刻可以搞得明，所以呢篇文章就同大家介紹下各種房型同床型具體係點樣嘅。
延伸閱讀：訂房網站大比併，Agoda、Booking、Hotels、Expedia同Ctrip（攜程）有咩分別，邊間更好更平
Book酒店慳錢教學：預訂酒店應該點樣格價先搵到邊個網站訂房最平
Twin Bed Room
Twin Bed Room即係最普通嘅標準雙人房，又叫雙床房，房入面有兩張單人床。係大部分酒店最基本同埋數量最多嘅房型，適合夫妻或者情侶以外嘅兩個人住，通常帶多個小朋友都得。每張單人床嘅尺寸大小並無一個統一標準，因為會視乎酒店所在嘅國家同地區，或者酒店嘅星級，床嘅大小都會有分別。
例如喺內地，大部分標準雙人房嘅床都係1.2米 × 2.0米，亦有1.5米 × 2.0米嘅。內地嘅OTA平台通常會寫明床嘅尺寸，例如：攜程（Ctrip）、藝龍等。外國嘅OTA平台就唔一定，例如 Agoda 就冇寫明，而 Booking 就有寫。▼
Double Bed Room
Double Bed Room又叫大床房，房入面有一張夠兩個人瞓嘅大床，適合夫妻或者情侶入住，一般都可以帶埋小朋友一齊住。床嘅大小同樣冇固定標準，內地通常係1.5米 × 2.0米，或者1.8米 × 2.0米。外國同等級酒店嘅床通常會細少少。
Single Bed Room
Single Bed Room即係單人房，房入面得一張細床，適合單身狗入住，咳，係適合一個人入住先真。通常呢種房型多數出現喺等級相對較低嘅酒店，房間面積一般都比較細，例如內地嘅青年旅舍、香港嘅平價賓館等，喺日本亦都非常常見。
如果你哋有兩個人入住，自問兩個人瞓呢種床都冇問題而照book呢種房型嘅話，其實係唔符合酒店規定㗎，萬一畀人發現，就要做好畀酒店趕走嘅心理準備喇。
King Size Bed Room同Queen Size Bed Room
King Size同Queen Size其實基本同Double Bed Room一樣，都係房入面只得一張雙人大床。呢兩種房型通常出現喺國際品牌嘅星級酒店。
國際標準係：King Size → 80×76（英寸）= 203×193（厘米）、Queen Size → 80×60（英寸）= 203×152（厘米）。大家只要記住一點就得：King Size係大過Queen Size嘅。
Semi-Double Room
Semi-Double係一種相對冇咁常見嘅房型，又叫經濟雙人房，有兩張床可以畀兩個人入住，比Double細，但比Single大。
總結
上面列出嘅係一啲基本根據床型嚟命名嘅房型名稱，另外仲有一啲根據裝修同面積嚟命名嘅稱呼都經常會遇到。例如：Standard（標準客房）、Superior（高級客房）、Deluxe（豪華客房）、Business（商務客房）、Suite（套房），其實佢哋嘅分別就係越高級嘅房型裝修就越靚，通常面積都會越大，當然價錢亦都越貴。仲有根據景觀命名嘅：Sea View（海景房）、Hill View（山景房）、Garden View（園景房）。
喺發達地區或者國家，同等級嘅酒店，床型通常都會細少少，例如香港、東京等，因為呢啲地方都係寸金尺土嘅。我哋可以咁樣理解，房價越高嘅地區，你可以瞓到嘅床就相對比較細。
通常OTA平台對每一種房型都會寫明最多入住人數。不過我哋有時候會唔知應該book幾多間房，例如2大1細、2大2細等，另外唔同酒店對於小朋友嘅定義亦都可能唔同。呢個時候我哋可以喺search嘅時候揀好入住人數，咁樣網站系統就會根據人數去顯示可以book嘅酒店。以 Agoda 為例：▼
喺酒店頁面一直向下拉，搵到「政策」就可以見到對小朋友嘅定義。▼
其實講咗咁多，一般人最易撈亂嘅就係Twin同Double，而且中文大家都叫雙人房，所以book酒店嘅時候一定要睇清楚網站嘅說明，到底係一張床定兩張床。有時候淨係睇個名都未必準，好似內地一啲網站會有咁嘅名稱：高級單人房同高級雙人房、豪華單人房同豪華雙人房，價錢係一樣嘅。其實呢種情況下嘅單人房就係大床房，係可以兩個人住嘅，而雙人房就係兩張床，所以book房嘅時候要特別留意具體說明。
通常大家book酒店最關心嘅就係價錢問題，大家都想搵到邊個網站訂房最平，但逐個逐個網站去對比真係好麻煩，小編為大家推介一個免費格價網站——Trivago，幫大家慳返格價嘅麻煩。
評論 (0)