Booking教學：回饋獎金 & Wallet 係咩？旅遊積分點用？現金積分點樣提現？

之前我介紹過 Agoda 有一個住賞錢計劃。佢嘅作用係透過 Agoda 預訂酒店並入住之後，Agoda 會回贈一定數量嘅住賞錢去你個戶口度，到你下次訂房嘅時候，呢啲住賞錢就等同現金，可以用嚟扣減部分甚至全部房費。

同 Agoda 屬於同一個集團嘅 Booking 都有一個類似嘅功能，叫做「回饋獎金 & Wallet」（Rewards & Wallet），佢嘅設定稍微複雜少少，下面同大家詳細解釋下。

Booking「回饋獎金 & Wallet」官網專頁：
https://www.booking.com/wallet.html

 咩係「回饋獎金 & Wallet」？

以下係 Booking 嘅官方解釋：

當您從 Booking.com 上的不同活動賺得回饋獎金（如積分和抵用券），我們會將這些回饋獎金存進您的 Wallet，讓您可清楚追蹤並輕鬆管理。
只要您擁有 Booking.com 帳戶，您的 Wallet 就會啟用。

當你透過一啲特殊途徑（目前主要係信用卡優惠活動）預訂並完成訂單嘅時候，你就會獲得積分或者抵用券回贈，呢啲回贈統稱為「回饋獎金」，而用嚟保存呢啲回贈嘅地方就叫做「Wallet」，合稱「回饋獎金 & Wallet」。

喺邊度查看「回饋獎金 & Wallet」

你可以直接打開 Booking 「回饋獎金 & Wallet」官網專頁，㩒前往「回饋獎金 & Wallet」按鈕進入「回饋獎金 & Wallet」。

或者入去 Booking 官網之後，登入帳號，喺「你的帳戶」選單入面㩒「回饋獎金 & Wallet」。

點樣賺取回贈（積分）？

同 Agoda 嘅住賞錢唔同，目前 Booking 嘅回贈（積分或者抵用券）一般只可以透過合作銀行推出嘅信用卡優惠活動去獲取，而且大部分都係以積分嘅形式回贈。

例如目前 DBS 嘅優惠活動：憑 DBS 信用卡經 Booking.com 指定網頁預訂指定酒店，可享高達 10% 回贈，用 Mastercard 甚至高達 16% 回贈。▼

經指定網頁入到 Booking 網站之後，喺搜尋酒店嘅時候，系統會提示你將會獲得幾多積分。▼

預訂有積分回贈嘅住宿，並使用指定信用卡付款，完成住宿之後就可以獲得積分回贈。積分通常需要 14 個工作天先會入到你個銀包，最多可能需要 60 個工作天。

積分係有有效期限嘅，你必須要喺到期之前用咗佢，如果唔係就會過期作廢。你可以隨時登入帳號，前往 Wallet 入面查看目前持有積分嘅有效期限。

值得留意嘅係，你必須要透過 Booking 官網並且註冊/登入帳號嚟預訂先可以獲得回饋獎金，透過 Booking 手機 APP 預訂係唔得㗎。另外，唔接受信用卡付款嘅住宿亦都冇辦法獲得回饋獎金。

點樣使用回饋獎金（積分）？

Booking 嘅積分有兩種，分別係「旅行積分」同埋「現金積分」。用唔同嘅信用卡可能會獲得唔同類型嘅積分。除此之外，有時候取消訂單，退款會以現金積分嘅形式退番去個 Wallet 度。

旅行積分

旅行積分可以用嚟預訂提供網上付款並且接受「Wallet」支付嘅訂單。可以用喺預訂特定住宿訂單、特定航班訂單、所有租車訂單、所有景點／活動訂單、所有的士訂單、所有保險訂單。

請注意，必須要接受「網上付款」嘅住宿先可以用旅行積分，但唔係所有住宿都接受「網上付款」嘅。搜尋住宿嘅時候，你可以喺篩選條件入面剔「接受網上付款」，直接搵曬所有合資格嘅住宿。▼

喺付款嘅頁面入面，選擇「立即付款」就可以用 Wallet 入面嘅旅行積分嚟畀錢（你亦都可以選擇系統設定嘅未來某個日子支付）。▼

用旅行積分畀錢嘅訂單，如果取消嘅話，根據訂單上面嘅取消條款，免費取消嘅訂單積分會自動退番，而唔可以取消嘅訂單積分就唔會退還。

現金積分

現金積分可以提現去信用卡/扣帳卡（Debit Card）（注意：只限 Visa 卡或者 Mastercard）。

提取現金積分嘅信用卡就係你喺系統入面保存咗用嚟畀錢嗰張信用卡，你可以喺帳戶管理嘅付款資訊入面設定。▼

回饋獎金 & Wallet FAQ

 如果前面關於「回饋獎金 & Wallet」嘅解釋仲未夠詳細，你可以進一步睇下官網嘅 FAQ 頁面：
https://secure.booking.com/rewards_and_wallet/faqs.html