由於 Agoda 預訂亞太區酒店有價格優勢，而亞太區亦都係香港人最熱門嘅出國旅遊地點之一，所以而家越來越多人用 Agoda 預訂外國酒店。用嘅人多咗，慢慢就會有人發現，Agoda 有一個叫做「神秘優惠」嘅預訂方式。顧名思義，呢個優惠真係好神秘。
平時我哋 book 酒店，都要揀住邊間，會有酒店名、地址等詳細資料，但係呢個「神秘優惠」只會提供酒店所在嘅城市區域、星級同價錢，至於間酒店叫咩名、詳細地址、酒店相等等詳細資訊就一概唔提供。
理論上喺畀錢之前你都唔會知間酒店係咩樣，位置喺邊度都唔知（點解話係理論上呢，後面會再解釋）。呢種 book 房方式，有啲似抽盲盒，如果好彩嘅話，你可以用極低嘅價錢 book 到原價好貴嘅酒店，慳返一筆。其實就算執唔到平貨，因為 Agoda 有「最低價保證」，你都只係用正常價錢 book 咗一間未知名字嘅酒店，基本上都唔會蝕底。
Agoda 「神秘優惠」嘅官方解釋：
什麼是 Agoda 神秘優惠？
透過「神秘優惠」項目，Agoda 能夠提供更多性價比極高的優質住宿，從豪華酒店到精品旅館，在全球範圍內為用戶提供價格更優惠的指定酒店住宿。這些酒店住宿將以匿名方式提供神秘優惠，用戶成功預訂且付款後，方可看到具體的酒店住宿名稱訊息。如何享受優惠？
神秘優惠擁有特別的標識。預訂前，您可瀏覽酒店住宿的主要訊息（大概位置、簡介和設施等），但您無法看到酒店住宿的名稱。完成預訂即可得知酒店住宿的名稱、位置、聯絡方式等詳細訊息。為使 Agoda 持續提供此類優惠，神秘優惠的預訂不可取消且不可退款。
咁到底，我哋可以喺邊度搵到呢個神秘優惠呢？首先進入 Agoda 官網，揀好你想去嘅城市 search 酒店，喺酒店列表上方嘅排序方式，㩒最右邊嘅「熱賣優惠」，你就可以喺酒店列表入面見到提供神秘優惠嘅酒店。提供神秘優惠預訂嘅酒店唔多，通常得 1-3 間左右，而且唔係所有城市都會有。▼
有時系統未必會將神秘優惠酒店排喺最前面，你可以喺篩選項嘅「優惠折扣」入面剔選「神秘優惠」，就可以直接搵到呢啲酒店。▼
問題嚟啦，我哋知道透過神秘優惠有機會平價 book 到靚房，但始終唔知間酒店係點樣，心入面梗係會囉囉攣。咁有冇辦法可以預先知道實際係 book 咗邊間酒店呢？答案係有嘅，我哋可以透過 Agoda 提供嘅有限資訊去估，其實一點都唔難估。
2019-10-22 更新開始（更快捷嘅方法）：
最近我發現咗一個新方法，就係利用搜尋引擎去 search 神秘酒店提供嘅關鍵資訊，咁樣就更容易搵到目標酒店。
喺「實用數據」入面我哋可以搵到呢啲關鍵資訊：「客房總數：497，建成年份：2004 」。▼
咁樣我哋就可以喺搜尋引擎度 search 以下關鍵字：「 Agoda 汐留 客房總數：497，建成年份：2004 」。搜尋結果嘅第一條就已經係目標酒店：「維拉芳泉東京汐留大酒店（Hotel Villa Fontaine Tokyo-Shiodome）」。▼
2019-10-22 更新結束
下面我哋以曼谷嘅神秘優惠做例子，「在素坤逸路區域的 5 星級住宿」。▼
喺呢間神秘優惠酒店嘅頁面度，我哋可以利用到啲咩資訊呢？
1，酒店評分：8+
2，酒店星級：5 星
3，酒店價格：￥608.62 起
4，酒店房型：特大套間、單臥室套房(特大床)
5，酒店設施：▼
而家，我哋根據呢啲酒店資訊，重新 search 一下曼谷嘅酒店，逐一篩選之後，基本上就可以搵出目標酒店。入到 Agoda 曼谷酒店列表之後，頁面左邊就係各種篩選項，小編根據上面嘅酒店資訊，點選咗以下選項：
因為神秘優惠嘅價錢理論上係低過或者等於正價，所以呢間酒店嘅「每晚單價」我哋揀 RMB600 以上。「酒店星級」揀 5 星及以上，「住客評分」揀 8.0 及以上，「地區」揀素坤逸路。▼
設施服務如下。其實揀越有特色嘅設施服務，就越容易搵到目標酒店。呢間酒店其中一項服務係「高爾夫球場（酒店內設）」，只要剔咗呢項服務做篩選，目標酒店即刻就出咗嚟。▼
透過以上嘅篩選，符合條件嘅酒店數量不斷減少，最後就淨低一間酒店，呢間就係神秘優惠嘅目標酒店：「曼谷蘇克哈姆維特公園萬豪行政公寓 (Sukhumvit Park Bangkok - Marriott Executive Apartments)」。▼
講到呢度，有啲朋友可能仲會有懷疑，真係呢間酒店？我哋點入去酒店嘅詳細頁面睇睇，各種設施同資料基本上一定會吻合神秘酒店嘅資訊，只要粗略比較下就得，我哋仲可以透過房型嚟做 double check 。▼
從上圖可以見到，房型嘅名係一模一樣嘅：特大套間同單臥室套房(特大床)。而家我哋基本上可以肯定，神秘優惠嘅目標酒店就係呢間萬豪酒店啦。價錢平咗幾多呢？￥761 - ￥608.62 = ￥152.38，相當於有 8 折優惠。
除咗用以上篩選嘅方法搵出目標酒店之外，根據窮遊一位網友嘅實測，仲有一個更直接嘅方法：填好 booking form 之後先唔好畀錢，然後差唔多到付款時限嘅時候，你會收到 Agoda send 畀你嘅一封催款 email，封 email 入面會清清楚楚咁話畀你聽間酒店叫咩名，呢個時候你就可以 check 下酒店詳情，覺得啱心水先再畀錢。▼
頭先介紹嗰間曼谷萬豪酒店，透過神秘優惠預訂，我哋實際攞到嘅折扣係 8 折，其實仲有更犀利嘅。睇下同樣來自窮遊另一位網友嘅經驗，可以做到低於 2 折。▼
總結：
睇完前面嘅分析就知道，我哋確實可以透過 Agoda 嘅「神秘優惠」攞到非常之高嘅訂房折扣，但並唔係人人都適合用呢種方式 book 房。
首先，神秘優惠嘅酒店數量非常少，搞到可以揀嘅範圍極細。第二，酒店嘅價錢同所在區域亦都唔一定啱所有人。
所以，如果你對酒店嘅位置冇咩特別要求，咁 book 房之前都可以先睇下你想住嘅目標區域有冇神秘優惠酒店。搵出呢間酒店嘅廬山真面目之後，再比較下價錢，如果樣樣都啱心水，咁恭喜你，今次真係執到寶啦！
Agoda 精選優惠活動：
評論 (0)