Points.com - 常客購買酒店積分或者飛行里數嘅專用網站

做開常客嘅朋友，買積分或者里數係好平常嘅事，相信唔少朋友都有買分嘅經驗，特別係做 promotion 嘅時候，性價比真係非常之高。講到買分，就不得不提今日要介紹嘅呢個網站：Points.com。

究竟 Points.com 係一個點樣嘅網站？點解咁多集團嘅常客計劃（Loyalty program）都一定要透過佢嚟買積分？喺度買積分又安唔安全㗎？呢篇文章就同大家詳細介紹下呢個網站啦。

Points.com 簡介 

Points.com 係全球最大嘅常客積分管理同交易平台。Points.com 網站域名早喺 1999 年已經成立，公司名稱係 Points International Ltd.，係一間加拿大（TSX:PTS）同美國納斯達克（NASDAQ:PCOM）嘅上市公司。

總部設於加拿大多倫多，喺美國三藩市同英國倫敦都有辦事處，都算得上係一間跨國企業，所以喺 Points.com 平台上進行交易都係好安全可靠嘅。

平台主打積分銀包功能，可以幫你管理、轉換同購買超過 50 個全球知名品牌常客計劃嘅積分或者里數。

購買積分或里數

大家最常用到 Points.com 嘅時候就係買積分嘅時候，因為大部分酒店同航空公司都係透過呢個平台嚟賣分，而且佢仲會經常推出促銷優惠，折扣最平可以低至半價（5 折）。

不過如果大家喺買分嘅時候無留意清楚個網址，可能會以為自己喺常客計劃嘅官網上面買緊，事關 Points.com 嘅買分頁面已經同各大集團嘅網站深度整合咗。當然都有例外，例如 Hilton（希爾頓），買分網址依然係 Hilton 嘅網址，但實際上整個買分過程都係由 Points.com 去處理（powered by Points）。

透過 Points.com 可以買到積分或者里數嘅常客計劃包括（㩒下面條 link 就可以直接入去買分頁面）：

酒店集團：

• 希爾頓榮譽客會（Hilton Honors）
• 萬豪旅享家（Marriott Bonvoy）
• 凱悅天地（World of Hyatt）
• 洲際優悅會（IHG One Rewards）
• 溫德姆獎賞（Wyndham Rewards）
• 麗賞會（Radisson Rewards）
• Choice Hotel
•  美利亞心禮程（Melia Rewards）

航空集團：

• Alaska Mileage Plan（阿拉斯加航空）
• Avios（英國航空）
• United Airlines MileagePlus（聯合航空）
• Air France（法國航空）
• Southwest Airlines（美國西南航空）
• Saudia Airlines（沙特航空）
• JetBlue Airways TrueBlue（捷藍航空）
• Etihad Airways（阿提哈德航空）
• Virgin Atlantic（維珍航空）

其實買積分或者里數係唔需要註冊 Points.com 帳號嘅，只要透過上面嘅買分連結入去官網，登入你嘅常客會員帳號就可以直接買。

當然你亦都可以註冊返一個 Points.com 帳號，只要連結咗你嘅常客計劃戶口之後，入去管理頁面㩒「Program highlights and benefits」→「Buy more miles for your account」一樣買得到。

Points.com 經常都會推出買分 promotion，呢啲時候買分會平一大截，大家可以 mark 實下面呢個頁面去獲取最新資訊：常客買分促銷優惠匯總。

管理積分或里數 

Points.com 作為一個積分管理平台，佢嘅管理功能非常之強大。只要註冊咗 Points.com 帳號，你就可以 link 曬你所有嘅常客戶口，方便一次過 check 曬所有戶口嘅資訊，慳返逐個官網登入去睇嘅時間。佢提供嘅管理功能包括：

• Track（追蹤）- 實時查看你嘅常客戶口最新資訊 
• Exchange（轉換）- 喺自己唔同嘅常客戶口之間轉換積分或里數 
• Redeem（兌換）- 用積分或里數兌換購物卡或者餐飲券 
• Buy（購買）- 購買積分或里數 
• Gift（贈送）- 買積分或里數送畀親友 
• Transfer（轉讓）- 將積分或里數轉讓畀其他人

雖然 Points.com 提供好多管理功能，但並唔係所有常客計劃都可以用到曬所有功能，當你連結咗常客戶口之後，就會見到有邊啲功能可以用。